நிலத்தைக் காக்கும் தெய்வம் வாஸ்து பகவான் என்பது நம் ஊர் நம்பிக்கை. அவர் ஆண்டு முழுவதும் உறங்கிக் கொண்டிருந்து, சில நாட்களில் மட்டும் கண் விழிப்பார். அப்படி அவர் விழித்திருக்கும் நாளில் நிலத்தைத் தொட்டு வேலையைத் தொடங்கினால், கட்டும் வீட்டுக்குத் தடை வராது, குடும்பத்துக்கு நல்லது நடக்கும் என்று சொல்வார்கள். அந்த நாளைத்தான் வாஸ்து நாள் என்கிறோம்.

இது கிரகப்பிரவேசத்திலிருந்து வேறு. கிரகப்பிரவேசம் என்பது கட்டி முடித்த வீட்டில் குடி புகுவது; வாஸ்து நாள் என்பது வேலையைத் தொடங்கும் நாள் — அஸ்திவாரம் தோண்டுவது, பூமி பூஜை செய்வது, கிணறு வெட்டுவது, நிலம் வாங்குவது போன்ற பணிகளுக்கு உரியது.

அன்றைக்கு என்னென்ன வேலை செய்யலாம்?

• பூமி பூஜை செய்து அஸ்திவாரம் தோண்டத் தொடங்கலாம்
• புதிதாக நிலம் வாங்குதல், பத்திரப் பதிவு செய்தல்
• கிணறு, போர் போடுவது; நீர் நிலை அமைப்பது
• நின்று போன கட்டுமானத்தை மீண்டும் தொடங்குவது
• வாஸ்து ஹோமம், வாஸ்து சாந்தி செய்வது

நேரத்தில் கவனிக்க வேண்டியது

மேலே கொடுத்திருக்கும் முகூர்த்த நேரத்துக்குள் வேலையைத் தொடங்கினால் போதும். அந்த நேரத்தின் கடைசி 36 நிமிடம் (தாம்பூலம் தரிக்கும் நேரம்) மிகவும் சிறந்ததாகச் சொல்லப்படுகிறது. ராகு காலம், எமகண்டம், குளிகை நேரங்களைத் தவிர்த்துக் கொள்ளுங்கள்.

பூமி பூஜை — பொதுவான செய்முறை

• நிலத்தைச் சுத்தம் செய்து, சாணம் தெளித்து, கோலம் போடுவது
• முதலில் கணபதி வழிபாடு; பின்பு வாஸ்து பகவானுக்குப் பூஜை
• வடகிழக்கு மூலையில் இருந்து அஸ்திவாரம் தோண்டத் தொடங்குவது
• நவதானியம், மஞ்சள், வெற்றிலை பாக்கு வைத்து வணங்குவது
• வீட்டுத் தலைவர் மனைவியுடன் சேர்ந்து பூஜையில் அமர்வது வழக்கம்

ஊருக்கு ஊர், குலத்துக்குக் குலம் சின்னச் சின்ன மாற்றங்கள் இருக்கும். உங்கள் வீட்டுப் புரோகிதரிடம் கேட்டு முடிவு செய்வது நல்லது.

கட்டத் தொடங்கும் முன் பார்க்க வேண்டியவை

• மனையின் நீளம், அகலம் மனையடி சாஸ்திரப்படி நல்ல அடியில் இருக்கிறதா
• வடக்கில் தெற்கை விட அதிக காலி இடம் விடப்படுகிறதா
• வடகிழக்கு தாழ்வாகவும், தென்மேற்கு உயரமாகவும் இருக்கிறதா
• வீட்டு எஜமானரின் ஜென்ம நட்சத்திரத்துக்கு அன்றைய நட்சத்திரம் ஒத்து வருகிறதா